קורס וועגן ייִדיש אין אוקראַיִנע במשך דעם 20סטן יאָרהונדערטCourse on Yiddish in Ukraine in the 20th century
דער אַרבעטער רינג וועט אויך לערנען אַ קורס וועגן די ייִדישע דיאַלעקטן בײַ די הײַנטיקע חרדים.
איינער פֿון די גרעסטע ייִדישע שרײַבער פֿון אוקראַיִנע איז געווען דוד בערגעלסאָן, וועלכער איז געבוירן געוואָרן אין סאַרנע, קיִעווער פּראָווינץ Photo by the Forward
ווי בײַ יעדן לערן־זמן פֿון דער ווירטועלער ייִדיש־פּראָגראַם בײַם אַרבעטער רינג, וועט מען במשך פֿונעם האַרבסט־זמן 2025 לערנען אַ צאָל אינטערעסאַנטע ווײַטהאַלטער־קורסן אויף ייִדיש.
דער פֿאָרשער גענאַדי עסטרײַך וועט לערנען אַ קורס וועגן דער ייִדישער ליטעראַטור אין אוקראַיִנע במשך פֿונעם 20סטן יאָרהונדערט, אַרײַנגערעכנט די שרײַבער פֿון דער „קיִעווער גרופּע“— דוד בערגעלסאָן און דער ניסתּר. מע וועט אויך דיסקוטירן די ייִדישע טאָגשולן אין די 1920ער און 1930ער; די השפּעה פֿונעם „קיִעווער אינסטיטוט פֿון דער ייִדישער קולטור“ און די ווערק פֿון די שרײַבער אַבֿרהם אַבטשוק, איציק קיפּניס, ריווע באַליאַסנע, חיים גילדין און הירש בלאָשטיין.
דער לינגוויסט לייזער בורקאָ וועט לערנען וועגן די ייִדישע דיאַלעקטן בײַ די הײַנטיקע חרדים, אַרײַנגערעכנט דעם אונגעריש־סאַטמערער דיאַלעקט פֿון וויליאַמסבורג, דעם ליובאַוויטשער דיאַלעקט פֿון קראַון־הײַטס און דעם ליטווישן פֿון לייקוווּד.
אָט זענען די אַנדערע קורסן וואָס מע קען אויסקלײַבן:
- אַן אינטענסיווער שפּראַכקורס צו פֿאַרבעסערן דאָס פֿאַרשטיין, לייענען, רעדן און שרײַבן ייִדיש (איוו יאַכנאָוויץ)
- מעשׂיות פֿון יצחק באַשעוויס זינגערס זכרונות, „אין מײַן טאַטנס בית־דין שטוב“ (שבֿע צוקער)
- די לידער פֿונעם אַוואַנגאַרדיסטישן פּאָעט יעקבֿ גלאַטשטיין (אַבֿרהם ליכטענבוים)
- מגילת־אסתּר אין דער מאָדערנער ייִדישער ליטעראַטור (נאַטאַליע קריניצע)
- שלום אַשעס ראָמאַן „קידוש השם“ (קאָליע באָראָדולין)
- ווי אַזוי אַרויסצורעדן און ניצן לשון־קודשדיקע טערמינען פֿון דער ייִדישער ליטעראַטור (יצחק ניבאָרסקי)
- וואָס וועט זײַן מיט דער צוקונפֿט פֿון ייִדישן הומאָר? (דניאל גלאַי)
- שלום עליכמס ראָמאַן „אין שטורעם“ (אַבֿרהם ליכטענבוים)
- אַ שמועסקרײַז מיטן ייִדישן נאָוועליסט און פּאָעט באָריס סאַנדלער
- דאָס קול פֿונעם ייִדישן שרײַבער (שבֿע צוקער)
נאָך מער פּרטים אָדער זיך צו פֿאַרשרײַבן אויף אַ קורס, גיט אַ קוועטש דאָ.
