זום: אַ סיום משניות אויף ייִדיש צו די שלושים פֿון חוה לאַפּין ז״לZoom: Learning a Mishnah chapter in Yiddish in memory of Yiddish scholar Chava Lapin
דער פֿאָרשער מיכל וועקס וועט אָנפֿירן דעם סיום פֿון משנה תּענית, אין דער ייִדישער איבערזעצונג פֿון חוה לאַפּינס פֿעטער, שׂ. פּעטרושקא
Photo by eBay
זונטיק, דעם 23סטן יולי, וועט מען דורך זום פּראַווען די שלושים פֿון דער באַליבטער ייִדיש־לערערין ד״ר חוה לאַפּין ע״ה דורך אַ סיום משניות.
מע וועט ניצן די ייִדישע איבערזעצונג פֿון חוה לאַפּינס פֿעטער, שׂ. פּעטרושקא, וועלכער האָט איבערגעזעצט אַלע זעקס משניות אויף ייִדיש.
דער פֿאָרשער און שרײַבער מיכל וועקס, װאָס האַלט איצט אין לערנען די גאַנצע מסכתּא, וועט אָנפֿירן דעם סיום דורכן לערנען מיטן עולם די לעצטע משנה פֿון מסכתּא תּענית.
דער עולם וועט אויך הערן זכרונות פֿון צוויי מענטשן, וואָס האָבן גוט געקענט חוה לאַפּינען: רייזל פֿישמאַן קאַנדיב, אַ מיטגליד פֿון דער ייִדיש־קאָמיטעט בײַ דער מאָנטרעאָלער ייִדישער פֿאָלקס־ביבליאָטעק, וועלכע איז אויך אַקטיוו מיטן דאָרע וואַסערמאַן־טעאַטער, און ד”ר הערשל גלעזער, פֿון דער ייִדיש־ליגע, און דער מיטרעדאַקטאָר פֿונעם אַרומנעמיקן ענגליש־ייִדישן ווערטערבוך.
לטובֿת די מענטשן וואָס ווילן פֿאַרן סיום אַליין לערנען אַ ביסל משנה, קען מען עס לייענען אויף ענגליש דאָ. (געפֿינט די אַכטע משנה פֿון פֿערטן פּרק.)
כּדי דאָס צו לערנען אויף ייִדיש, קען מען עס געפֿינען אין פּעטרושקאס טעקסט דאָ. זוכט אויס סדר מועד, מסכתּא תענית, וואָס הייבט זיך אָן אויף זײַט 402, פּרק ד׳ אויף ז׳ 416 און משנה ח׳ אויף ז׳ 422.
דער סיום קומט פֿאָר דעם 23סטן יולי, צוויי אַ זייגער נ”מ ניו־יאָרקער צײַט. פֿאַררעגיסטרירט זיך דאָ.
