Khane-Faygl by the Forward

באַליבטע פֿאָרווערטס־שרײַבערין חנה־פֿײַגל טערטלטויב איז אַוועק

Popular Forverts writer Khane-Faygl Turtletaub has died

פֿרײַטיק, דעם 19טן מאַרץ, איז די פּאָפּולערע פֿאָרווערטס־שרײַבערין, מחברטע פֿון ייִדישע קינדערלידער און איבערזעצערין, ד״ר חנה־פֿײַגל טערטלטויב, געשטאָרבן פֿון אַ ראַק בײַ זיך אין שטוב אין עוואַנסטאָן, אילינוי.

חנה־פֿײַגל, וואָס האָט תּמיד געבעטן מע זאָל אויסלייגן איר נאָמען לויטן פּויליש־ייִדישן אַרויסרייד, „פֿײַגל‟, אַנשטאָט „פֿייגל‟, האָט געשריבן הומאָריסטישע עסייען פֿאַרן פֿאָרווערטס וועגן אירע שוועריקייטן, ווי אַן אַלמנה, צו געפֿינען אַ שידוך. אירע דערציילונגען זענען געווען פֿון אַ סאָרט וואָס מע זעט זעלטן אויף ייִדיש — אומפֿאָרמעלע, פּערזענלעכע דערציילונגען, געשריבן פֿון אַ פֿרויס קוקווינקל. צווישן זיי: „די שדכנטע וויל אויך חתונה האָבן‟ און „איך בין אַ מאַמע אָבער נישט זײַן מאַמע‟.

די פֿאָרווערטס־רעדאַקציע האָט אָפֿט באַקומען בריוו פֿון לייענער, פֿרעגנדיק ווען קומט שוין אַרויס נאָך אַ זאַך חנה־פֿײַגלס. אַ סך לייענער, און איך בתוכם, האָבן הנאה געהאַט פֿון איר שמועסדיקן סטיל און אירע אַוואַנטורעס בײַם זוכן ליבע אין דער אינטערנעץ־תּקופֿה — אַרײַנגערעכנט באַשרײַבונגען פֿון אירע נישט־געלונגענע ראַנדקעס, וואָס האָבן אַרויסגעוויזן אַ גוטן פֿאַרשטאַנד פֿון דער מענטשלעכער נאַטור.

חנה־פֿײַגל האָט אויך געשאַפֿן ייִדישע קינדערלידער — סײַ דעם טעקסט סײַ די מוזיק — און האָט זיי אַרויסגעגעבן ווי אַ ביכל און קאָמפּאַקטדיסק. אַ דאַנק דעם וואָס זי האָט אָנגעשטעלט אַן אָרקעסטער און קינדערכאָר צו מאַכן דעם דיסק, האָט עס טאַקע אַ פּראָפֿעסיאָנעלן טעם.

מיט איר מאַן, שעפּסל טערטלטויב, האָט זי אויך געשריבן אַ מוזיקאַלישע קאָמעדיע אויף ענגליש, Love in the Catskills וואָס מע האָט אויפֿגעפֿירט אין 1998 אינעם ייִדישן קהילה־צענטער אין סקאָקי, אילינוי — דאָס אָרט וווּ ס׳איז אַ מאָל געשטאַנען דער „נאַציאָנאַלער ייִדישער טעאַטער‟ .

חנה־פֿײַגל טערטלטויב איז געבוירן געוואָרן אין קאַזאַכסטאַן אין 1945 און דערצויגן געוואָרן אין בראָנקס, וווּ זי האָט זיך געלערנט אין דער אַרבעטער־רינג שול אויף יוניווערסיטי עוועניו. זי האָט באַקומען אַ דאָקטאָראַט אין קונסט־געשיכטע אָבער במשך פֿון די יאָרן האָט זי אויסגעזוכט שטעלעס פֿאַרבונדן מיט ייִדיש, ווײַל דאָס האָט איר געשאַפֿן די גרעסטע הנאה, האָט זי געזאָגט. זי האָט געלערנט ייִדיש־קורסן אינעם שיקאַגער צווײַג פֿון ייִוואָ און איינער פֿון אירע באַרימטסטע סטודענטן איז דער אַקטיאָר סטיוו סקײַבעל, וואָס האָט שפּעטער געשפּילט טבֿיה אין דער פֿאָלקסבינעס פּראָדוקציע, „פֿידלער אויפֿן דאַך אויף ייִדיש‟. נישט איין מאָל האָט סקײַבעל, בעת אַן אינטערוויו מיט אַ צײַטונג, געזאָגט, אַז ער האָט זיך געלערנט ייִדיש בײַ חנה־פֿײַגל טערטלטויב.

חנה־פֿײַגל טערטלטויב האָט פֿאַראָבֿלט אירע קינדער — דזשאָש (שיִעלע), דזשערעמי (יאָמי), דזשעסיקע (יסכּה־שׁרה) און דזשאָנאַטאָן (ניסי), און איר שוועסטער, טײַבל.

די משפּחה בעט אַז אַנשטאָט בלומען זאָל מען אין איר אָנדענק טאָן אַלץ וואָס מע קען צו פֿאַרזיכערן אַז ייִדיש זאָל בלײַבן אַ לעבעדיקע שפּראַך.

זאָל זי האָבן אַ ליכטיקן גן־עדן.

באַליבטע פֿאָרווערטס־שרײַבערין חנה־פֿײַגל טערטלטויב איז אַוועק

Your Comments

The Forward welcomes reader comments in order to promote thoughtful discussion on issues of importance to the Jewish community. All readers can browse the comments, and all Forward subscribers can add to the conversation. In the interest of maintaining a civil forum, The Forward requires that all commenters be appropriately respectful toward our writers, other commenters and the subjects of the articles. Vigorous debate and reasoned critique are welcome; name-calling and personal invective are not and will be deleted. Egregious commenters or repeat offenders will be banned from commenting. While we generally do not seek to edit or actively moderate comments, our spam filter prevents most links and certain key words from being posted and the Forward reserves the right to remove comments for any reason.

Recommend this article

באַליבטע פֿאָרווערטס־שרײַבערין חנה־פֿײַגל טערטלטויב איז אַוועק

Thank you!

This article has been sent!

Close