פֿאָלקסבינע “לײַוו”־קאָנצערט מיט ייִדישער דזשעז־דיוואַ, טערעזאַ טובֿהFolksbiene! LIVE concert with Yiddish jazz diva Theresa Tova
די פֿאָרשטעלונג נעמט אַרײַן נײַע ייִדישע איבערזעצונגען פֿון צוויי קלאַסישע דזשעזלידער, „אַ שטורמישער וועטער‟ און „נאַכט און טאָג‟.
Image by flickr
דעם 7טן נאָוועמבער וועט די ייִדישע זינגערין און אַקטריסע, טערעזאַ טובֿה, באַקאַנט ווי „די ייִדישע דיוואַ‟, אויפֿטרעטן אויף „פֿאָלקסבינע לײַוו‟ מיט אַ קאָנצערט פֿון אירע באַליבטסטע לידער, אַרײַנגערעכנט נײַע ייִדישע איבערזעצונגען פֿון צוויי קלאַסישע דזשעזלידער — Stormy Weather און Night and Day.
דער קאָנצערט, וואָס הייסט „האַרבסטלידער‟, איז פּראָדוצירט געוואָרן פֿון דער פֿאָלקסבינע.
כאָטש טערעזאַ טובֿהס רײַכע, אויסדריקלעכע שטימע, וואָס די ייִדישוועלט האָט אַנטדעקט נאָך מיט יאָרן צוריק דורך איר דזשעזישן אופֿן זינגען ביילע שעכטער־גאָטעסמאַנס ליד, „דער סאַקסאָפֿאָן־שפּילער‟, דערמאָנט אַ ביסל אין די שוועסטער בערי, איז איר סטיל פֿון זינגען פֿאָרט אַנדערש: מער בענקעוודיק, אַפֿילו אַ ביסל מעלאַנכאָליש, אַזוי ווי מע הערט בײַ די אַמאָליקע זינגערינס לינאַ האָרן און עלאַ פֿיצדזשעראַלד.
די פּאַריז־געבוירענע טערעזאַ טובֿה איז אַ באַקאַנטע אַקטריסע אין קאַנאַדע, ווי אויך די מחברטע פֿון אַ צאָל אָנגעזעענע מיוזיקלס. איר אינטערעס צו ייִדישע לידער איז אָבער געקומען ערשט שפּעטער.
„ווי אַן אַקטריסע האָב איך ס׳רובֿ פֿונען לעבן געפּרוּווט זײַן אַ מענטש וואָס איך בין נישט,‟ האָט זי געזאָגט. „איך בין אַ טאָכטער פֿון צוויי לעבן געבליבענע פֿון חורבן. מײַן מאַמע האָט טאַקע געמוזט באַהאַלטן ווער זי איז כּדי זיך צו ראַטעווען, אָבער ווי אַ ייִדיש־דיוואַ, קען איך זינגען הויך פֿאַר דער גאַנצער וועלט.‟
נאָך מער אינפֿאָרמאַציע וועגן טערעזאַ טובֿה אָדער צו זען דעם קאָנצערט דעם 7טן נאָוועמבער, גיט אַ קוועטש דאָ.
