האַרוואַרד־ייִדיש־אָפּטייל פֿירט ווירטועלע גראַדויִר־קאָנפֿערענץHarvard Yiddish Studies hosts virtual graduate conference
צווישן די טעמעס: דער וויכּוח צווישן אַ סאָוועטישן ייִדישלאַנד און אַ ציוניסטישן העברעיִש־לאַנד, און אַ לעקציע וועגן אַרגענטינער ייִדישע פּאָעטעסעס.
Image by Wikimedia Commons
דער אָפּטייל פֿון ייִדיש־לימודים בײַם האַרוואַרד־אוניווערסיטעט פֿאַרבעט גראַדויִר־סטודענטן, אַוואַנסירטע ביז־גראַדויִר־סטודענטן און יונגע אַקאַדעמיקער זיך צו באַטייליקן אין אַ ווירטועלער קאָנפֿערענץ וועגן ייִדיש־לימודים דעם 20סטן און 21סטן פֿעברואַר.
די באַטייליקטע וועלן זיך דערוויסן וועגן אָריגינעלע פֿאָרשונגען וואָס מע האָט לעצטנס דורכגעפֿירט; אָנטייל נעמען אין וואַרשטאַטן און זיך פֿאַרבינדן מיט קאָלעגעס אינעם פֿעלד פֿון ייִדיש־לימודים.
דער צײַטפּלאַן נעמט אַרײַן סעסיעס אויף כּלערליי טעמעס ווי, למשל, דאָס דורכקוקן צוזאַמען פֿאַרשידענע דאָקומענטן אויף ייִדיש געבאָרגט פֿונעם אַרכיוו פֿון די פֿרײַנד פֿון ייִוואָ; אַ רעפֿעראַט וועגן דעם וויכּוח אין די 1920ער צווישן אַ סאָוועטישן ייִדישלאַנד אָדער אַ ציוניסטישן העברעיִש־לאַנד; אַ דיסקוסיע וועגן די ווערק פֿון אַרגענטינער פּאָעטעסעס, און אַן איבערבליק פֿון די איבערלעבונגען פֿון מענטשן וואָס לערנען זיך הײַנט ייִדיש בײַ דער שפּראַך־אַפּליקאַציע, דואָלינגאָ.
כּדי זיך צו פֿאַרשרײַבן אויף דער קאָנפֿערענץ גיט אַ קוועטש דאָ.
