ווידעאָ: אַ נײַ ייִדיש ליד, „די װעלט איז אַװעק און מיר זײַנען געבליבן“ VIDEO: A new Yiddish song, ‘The world has left and we stayed behind’
Courtesy of Jordan Wax
די וואָך האָט דזשאָרדאַן וואַקס, אַ ייִדישער מוזיקער פֿון אַלבעקערקי, ניו־מעקסיקאָ, אַרויפֿגעשטעלט אַ ווידעאָ פֿון אַ ייִדיש ליד וואָס ער האָט אָנגעשריבן, באַשרײַבנדיק דעם מצבֿ פֿון די מענטשן וואָס לײַדן עד־היום פֿונעם קאָראָנאַ־ווירוס. צוליב דעם וואָס אַזוי פֿיל מענטשן האָבן זיך שוין אומגעקערט צום טאָג־טעגלעכן לעבן אַזוי ווי פֿאַר דער מגפֿה, פֿאַרגעסט מען אַז אַ ממשותדיקע צאָל מענטשן מוטשעט זיך ווײַטער דערפֿון.
וואַקס, וואָס זינגט און שפּילט דעם אַקאָרדיאָן, האָט ביז לעצטנס אָנגעפֿירט מיט אַ וואָכנטלעכער שמועס־גרופּע אויף ייִדיש, צום טייל כּדי עמאָציאָנעל אונטערצושטיצן די מענטשן וואָס זענען שטעקן געבליבן אין דער היים צוליב „קאָוויד“, און איז איינער פֿון די גרינדער פֿונעם StopGolus Collective — אַן איניציאַטיוו צו מוטיקן יונגע לײַט זיך צו דערנענטערן צו זייערע אַשכּנזישע קולטור־וואָרצלען.
