ווידעאָ: די געשיכטע פֿון ייִדיש אין תּל־אָבֿיבֿ (אויף ייִדיש) Video: The history of Yiddish in Tel Aviv (in Yiddish)
Image by League for Yiddish
ס׳איז לעצטנס אַרויס די רעקאָרדירונג פֿון אַן אינטערוויו מיטן ישׂראלדיקן פֿאָרשער פֿון דער ייִדישער ליטעראַטור, יעד בירן, וווּ ער דערציילט וועגן די אַמאָליקע ייִדישע שרײַבער און די ווערק וואָס זיי האָבן געשאַפֿן אין ארץ־ישׂראל, און בפֿרט אין תּל־אָבֿיבֿ.
בירן רעדט אויך וועגן דעם מעמד פֿון ייִדיש אַקעגן העברעיִש, און וועגן ייִדיש אין תּל־אָבֿיבֿ הײַנטיקע צײַטן, אַרײַנגערעכנט זײַן אַרבעט ווי אַ ייִדיש־טורפֿירער און שרײַבער פֿון ייִדיש־קאַבאַרעטן.
דער ווידעאָ איז טייל פֿון „ייִדיש הײַנט“ — אַ סעריע אינטערוויוען אַרויסגעלאָזט פֿון דער „ייִדיש־ליגע“ מיט פּערזענלעכקייטן פֿון דער ייִדישער גאַס. מיטן שמועס, וואָס ווערט געפֿירט אויף ייִדיש, פֿירט אָן אלי בענעדיקט.
יעד בירן איז געבוירן געוואָרן אין 1976. זײַן דאָקטאָראַט באַהאַנדלט די רײַזעס פֿון ייִדישע שרײַבער קיין ארץ־ישׂראל. ער האָט געלערנט ייִדיש־שפּראַך און ־ליטעראַטור אין חיפֿה־, תּל־אָבֿיבֿ־ און העברעיִשן אוניווערסיטעט, ווי אויך אין ייִוואָ און בית־שלום־עליכם. ער האָט געשריבן אַ בוך דערציילונגען אויף העברעיִש לצחוק עם לטאות (לאַכן מיט יאַשטשערקעס), וואָס זייער הויפּט־מאָטיוו איז ייִדיש.
זײַן סעריע ייִדיש־קאַבאַרעטן, אסתּרס קאַבאַרעט, האָט מען פֿאָרגעשטעלט איבער גאַנץ ישׂראל. בירן איז אויך אַ שאַפֿער פֿונעם טורפּראָיעקט ייִדיש אויף די גאַסן, אין וועלכן ער פֿירט טורן וואָס גייען נאָך די שפּורן פֿון ייִדיש־קולטור אין תּל־אָבֿיבֿ און ירושלים.
