זינגערײַ מיט אַלעכאַנדראַ טשאַרני Yiddish sing-along with Alejandra Czarny
די אַרגענטינער זינגערין און ראַדיאָ־פּערזענלעכקייט פֿירט יעדע וואָך אָן מיט אַ זום־טרעפֿונג „טיי מיט ייִדישע לידער“.
Image by Alejandra Czarny
יעדן מיטוואָך 4 אַ זייגער ניו־יאָרקער צײַט פֿירט די ייִדישע זינגערין אַלעכאַנדראַ טשאַרני אָן מיט אַ זינגערײַ, „טיי מיט ייִדישע לידער“. אין דער פּראָגראַם זינגט זי סײַ מיטן עולם וואָס קומט אָן דורך זום, סײַ מיט ספּעציעל פֿאַרבעטענע געסט. די וואָך איז איז אויפֿגעטראָטן צוזאַמען מיטן אַרגענטינער זינגער רוני גאָלדבערג.
מע בעט אַז די וואָס באַטייליקן זיך זאָלן געבן אַ בײַשטײַער פֿון צען דאָלאַר.
טשאַרני איז דערצויגן געוואָרן אין אַרגענטינע. בײַ אירע עלטערן, פּוילישע ייִדן פֿון דער שארית־הפּליטה, האָט זי זיך אויסגעלערנט ייִדישע פֿאָלקסלידער. אין די 1990ער יאָרן האָט זי אַרויסגעלאָזט דרײַ אַלבאָמען מיט אירע אייגענע קאָמפּאָזיציעס צו לידער פֿון אַבֿרהם סוצקעווער, איציק מאַנגער און איזי כאַריק. זי האָט אויך אָנגעפֿירט מיט אַ ייִדיש־שפּראַכיקער ראַדיאָ־פּראָגראַם. אין 2003 האָט זי זיך באַזעצט אין פֿלאָרידע, וווּ זי דינט הײַנט ווי די מוזיק־לערערין בײַם ”טעמפּל־סיני“ אין האָליוווּד, ניט ווײַט פֿון מיאַמי.
טשאַרני קאָמפּאָנירט אויך מוזיק צו באַגלייטן הײַנטצײַטיקע לידער. נאָכן לייענען אַ נײַ ליד פֿונעם ייִדישן קולטור־טוער משה ראָזענפֿעלד אינעם פֿאָרווערטס, „כּבֿוד־19, גיי שוין, אַוועק!“, האָט זי אָנגעשריבן מוזיק עס צו באַגלייטן. איר נוסח קען מען הערן דאָ:
