פֿאָרלייענונג פֿון מגילת־אסתּר אויף ייִדיש דורך דער פֿאָלקסבינעYiddish megillah reading with the Folksbiene
שמואל עצמון, גרינדער פֿון „ייִדישפּיל‟, און מאַיאַ מאָרגענשטערן, דירעקטאָרין פֿון רומענישן ייִדישן מלוכישן טעאַטער, וועלן אָנטיילנעמען.
יעדעס יאָר אָרגאַניזירט די פֿאָלקסבינע אַ פֿאָרלייענונג פֿון מגילת־אסתּר אויף ייִדיש אין יהואשס איבערזעצונג ווי אַ טייל פֿון זייערע פּורים־פֿײַערונגען. צוליב דעם וואָס מע קען זיך ניט צונויפֿקומען פּנים־אל־פּנים די טעג, טוט מען עס אָנלײַן — קען מען דערפֿאַר אויך פֿאַרבעטן געסט פֿון אויסלאַנד.
די פּראָגראַם וועט פֿאָרקומען די נאַכט פֿון פּורים — דאָנערשטיק, דעם 25סטן פֿעברואַר, 7:00 אין אָוונט ניו־יאָרקער צײַט. כּדי צו זען די פֿאָרלייענונג, גיט אַ קוועטש דאָ.
עס וועלן אָנטיילנעמען:
פֿון ישׂראל: דער לעגענדאַרער אַקטיאָר און גרינדער פֿונעם „ייִדישפּיל“־טעאַטער — שמואל עצמון, און דער אַקטיאָר און גרינדער פֿון „יונג־ייִדיש“ — מענדי כּהנא.
פֿון קאַנאַדע: די כּלל־טוערין רבֿקה אויגענפֿעלד און די ייִדיש־לערערין חנה פֿישמאַן־גאָנשאָר.
פֿון רומעניע, די ייִדישע אַקטריסע און דירעקטאָרין פֿונעם אָרטיקן ייִדישן מלוכישן טעאַטער מאַיאַ מאָרגנשטערן.
פֿון אויסטראַליע: די ייִדישע זינגערין און לערערין פֿריידי מראָצקי.
פֿון אַרגענטינע: דער אַקטיאָר רפֿאל גאָלדוואַסער. פֿון אַמעריקע: די חזנטע חנהלע בראַון, די שרײַבערין דזשינעט פֿרידמאַן און דער קינסטלערישער דירעקטאָר פֿון דער פֿאָלקסבינע — זלמן מלאָטעק.
דער קאָנפֿעראַנסיע פֿון דער פּראָגראַם וועט זײַן מאָטל דידנער.
נאָך דער פֿאָרלייענונג גופֿא וועט זיסל סלעפּאָוויטש אויפֿטרעטן מיט זײַן קאַפּעליע, „ליטוואַקוס“.
די פֿאָלקסבינע אָרדנט אויך אײַן עטלעכע אַנדערע אונטערנעמונגען לכּבֿוד פּורים.
מאָנטיק, דעם 22סטן פֿעברואַר, 1:00 נאָך מיטאָג ניו־יאָרקער צײַט, וועט זלמן מלאָטעק זינגען אַ פּאָפּורי פּורים־לידער.
דינסטיק, דעם 23סטן פֿעברואַר, 1:00 נאָך מיטאָג ניו־יאָרקער צײַט, וועט מאָטל דידנער אַרויסלאָזן אַ פֿילמירטע ייִדיש־לעקציע אין פֿאָרעם פֿון אַ פּורים־שפּיל.
מיטוואָך, דעם 24סטן פֿעברואַר, 7:00 אין אָוונט ניו־יאָרקער צײַט, וועט מען טראַנסמיטירן אַ קאָנצערט „הבֿה־טעקילע“ מיט אַ צאָל שטערן פֿון פֿאָלקסבינע־פֿאָרשטעלונגען, אַרײַנגערעכנט מיכל יאַשינסקי, דנילה ראַבאַני און דער קלאַרנעט־שפּילער מײַקל ווינאָגראַד.
