מזל־טובֿ! אַ זום־פֿײַערונג לכּבֿוד רעדאַקטאָר ישׂראל רודניצקיס 100סטן געבוירן־טאָגMazel tov! A Zoom celebration of Yiddish editor Yisroel Rudnitsky’s 100th birthday
זעט אויך אַ לעבעדיקן אינטערוויו מיט אים וועגן זײַנע קינדעריאָרן אינעם שטעטל הײַדוצישאָק און זײַן יוגנט אין ווילנע.
Courtesy of the Yiddish Book Center
דעם 10טן יוני וועט דאָס לייוויק־הויז אין תּל־אָבֿיבֿ פּראַווען דורך זום דעם הונדערטסטן געבוירן־טאָג פֿונעם ייִדישן רעדאַקטאָר און איבערזעצער ישׂראל רודניצקי. אין 2021 האָט די נאַציאָנאַלע אינסטאַנץ פֿאַר ייִדישער קולטור באַלוינט רודניצקין מיטן לעבן־אויפֿטו־פּרײַז.
רודניצקי איז צום בעסטן באַקאַנט ווי דער רעדאַקטאָר פֿונעם גרויסן יזכּור־בוך פֿון ווילנע, „ווילנער זאַמלבוך‟, אַרויסגעגעבן אין ישׂראל אין 1974. ער האָט אויך געדינט ווי דער שעף־רעדאַקטאָר פֿונעם י. ל. פּרץ פֿאַרלאַג און דער ייִדיש־רעדאַקטאָר פֿונעם תּל־אָבֿיבֿער אוניווערסיטעט.
לויט דניאל גלאַי, דעם דירעקטאָר פֿון לייוויק הויז, זענען אונטער רודניצקיס רעדאַקטור דערשינען הונדערטער ביכער אויף ייִדיש, העברעיִש און אַנדערע שפּראַכן.
די פֿײַערונג לכּבֿוד רודניצקין וועט פֿאָרקומען מאָנטיק, דעם 10טן יוני, 6:00 אין אָוונט ירושלימער צײַט, 11:00 אין דער פֿרי ניו־יאָרקער צײַט. כּדי זיך אָנצושליסן אין דער אונטערנעמונג גיט אַ קוועטש דאָ.
ישׂראל רודניצקי איז געבוירן געוואָרן אין 1924 אינעם ייִדישן שטעטל הײַדוצישאָק, לעבן ווילנע. נאָך דעם ווי די משפּחה האָט זיך אַריבערגעצויגן קיין ווילנע איז ער געווען אַ תּלמיד אין דער ייִדישער רעאַל־גימנאַזיע. במשך פֿון די מלחמה־יאָרן איז ער געוואָרן אַ וואַלד־פּאַרטיזאַנער און דערנאָך געדינט אין דער רויטער אַרמיי.
נאָך דער מלחמה האָט ער געאַרבעט אין אַ יוגנט־פֿאַרלאַג אין ווילנע און אין 1956 האָט ער פֿאַרענדיקט דעם רעדאַקציע־פֿאַקולטעט פֿון מאָסקווער פּאָליגראַפֿישן אינסטיטוט. ער האָט עולה געווען אין 1961, וווּ ער האָט זיך פֿאַרנומען מיט רעדאַקטירן, קאָרעקטירן און באַגלייטן צום דרוק ייִדישע ביכער; אובערגעזעצט ביכער פֿון אַנדערע שפּראַכן אויף ייִדיש און געדרוקט רעפּאָרטאַזשן אין „די לעצטע נײַעס“. צווישן 2001 און 2005 איז ער געווען דער רעדאַקטאָר פֿונעם קוואַרטלניק „טאָפּלפּונקט“.
אין 2014 האָט דער ייִדישער ביכער־צענטער געמאַכט מיט אים אַ פּרעכטיקן אינטערוויו וועגן זײַנע קינדעריאָרן אין הײַדוצישאָק, אירע ייִדישע שולעס, די באַציִונגען צווישן די ייִדן און נישט־ייִדן, זײַן איבערראַשונג בײַם אָנקומען אין דער גרויסער שטאָט ווילנע, דעם פּאָליטישן לעבן אין דער רעאַל־גימנאַזיע און זײַן פּאָזיטיווער איבערלעבונג נאָך דעם ווי די סאָוועטן האָבן פֿאַרכאַפּט ווילנע.
צו זען דעם ווידעאָ, געמאַכט פֿון קריסטאַ וויטני פֿאַרן „בעל־פּה־פּראָיעקט אויפֿן נאָמען וועקסלער“, גיט אַ קוועטש דאָ.
A message from our Publisher & CEO Rachel Fishman Feddersen
I hope you appreciated this article. Before you go, I’d like to ask you to please support the Forward’s award-winning, nonprofit journalism during this critical time.
At a time when other newsrooms are closing or cutting back, the Forward has removed its paywall and invested additional resources to report on the ground from Israel and around the U.S. on the impact of the war, rising antisemitism and polarized discourse.
Readers like you make it all possible. Support our work by becoming a Forward Member and connect with our journalism and your community.
— Rachel Fishman Feddersen, Publisher and CEO
