קאָנצערט פֿון „ייִדישן פֿילהאַרמאָנישן פֿאָלקסכאָר‟ געווידמעט ליבעJewish People’s Philharmonic Chorus Concert, “Yiddish Flavors of Love”
אַחוץ נײַע אַראַנזשירונגען פֿון באַקאַנטע לידער וועט מען אויפֿפֿירן פֿריש איבערגעזעצטע לידער פֿון אָפּערעס און האָליוווּדער פֿילמען.
Image by JPPC
דער „ייִדישער פֿילהאַרמאָנישער פֿאָלקסכאָר‟, וואָס פּראַוועט הײַיאָר זײַן 97סטן סעזאָן, וועט אין גיכן אויפֿטרעטן מיט אַ ספּעציעלער סעפּטעמבער־קאָנצערט אָפּגעגעבן דער טעמע ליבע. דער קאָנצערט, וואָס קומט פֿאָר זונטיק, דעם 15טן סעפּטעמבער, וועט אַרײַננעמען לידער וואָס שילדערן אַלע סאָרטן ליבע — ראָמאַנטישע, פּאַטריאָטישע און פֿאָטערישע ליבע.
צווישן די לידער, וואָס מע וועט אויספֿירן אין נײַע אַראַנזשירונגען פֿונעם כאָרס לאַנגיאָריקן דיריגענט בנימין שעכטער: „אויפֿן וועג שטייט אַ בוים‟, „אויפֿן אויוון זיצט אַ מיידל‟ און „אוי, דאָרטן, דאָרטן‟. די פּראָגראַם נעמט אויך אַרײַן עטלעכע באַקאַנטע לידער, וואָס מע האָט לעצטנס איבערגעזעצט אויף מאַמע־לשון, אַרײַנגערעכנט לידער פֿון די אָפּערע־קאָמפּאָזיטאָרן דזשיאַקאָמאָ פּוטשיני און דזשאָרדזש פֿרידריך האַנדל און דאָס הויפּטליד פֿונעם קלאַסישן פֿילם, The Godfather.
לטובֿת די אין עולם וואָס קענען ניט קיין ייִדיש, וועט יעדעס ליד באַגלייט ווערן מיט ענגלישע אייבערקעפּלעך און אינעם פּראָגראַם־פּראָספּעקט וועלן פֿיגורירן די טעקסטן פֿון די לידער אויף ייִדיש און ענגליש.
דער קאָנצערט וועט פֿאָרקומען דרײַ אַ זייגער נאָכמיטאָג בײַם „מערקין קאָנצערט־זאַל‟ אין לינקאָלן־צענטער, ניו־יאָרק. כּדי צו באַשטעלן אַ בילעט, קוועטשט דאָ.
אַחוץ דער פֿאָלקסבינע און דעם פֿאָרווערטס זענען ניטאָ קיין ייִדישע קולטור־אינסטיטוציעס, וואָס האָבן אַזאַ לאַנגע געשיכטע ווי דער „ייִדישער פֿילהאַרמאָנישער פֿאָלקסכאָר‟. דער פֿאָלקסכאָר איז געגרינדעט געוואָרן ווי דער „פֿרײַהייט געזאַנג־פֿאַראיין‟ אין 1922 אויפֿן איסט־סײַד דורכן לעגענדאַרן דיריגענט און קאָמפּאָזיטאָר לאַזאַר ווײַנער. במשך פֿון די יאָרן האָט דער כאָר געזונגען אין „קאַרנעגי־האָל‟, „לינקאָן־צענטער‟, „סימפֿאָני־ספּייס‟ און „דעם קאַטעדראַל פֿון סאַנקט דזשאָן‟. לכתּחילה פֿאַרבונדן מיט דער קאָמוניסטישער פּאַרטיי, איז דער כאָר שוין לאַנג אומפּאַרטײיִש. זינט 1995 דיריגירט אים בנימין שעכטער.
