דיבוקים, אַ זאָנדערקאָמאַנדאָ־טאָגבוך און שלום־עליכם דער זשורנאַליסט — נײַע קורסן אויף ייִדיש Classes on dybbuks, a Sonderkommando diary and Sholem Aleichem’s journalism to be taught in Yiddish
צווישן די לערער: יצחק ניבאָרסקי, דוד כּ׳׳ץ, מרים טרין, שבֿע צוקער, אַבֿרהם ליכטנבוים, קאָליע באָראָדולין און גענאַדי עסטרײַך.
Image by Workers Circle
די ייִדיש־פּראָגראַם בײַם אַרבעטער־רינג ווערט שוין אַ גאַנצער פֿאָלק־אוניווערסיטעט פֿאַר זיך. דעם קומענדיקן זמן, וואָס הייבט זיך אָן אין אָקטאָבער, וועט אַרײַננעמען 31 שפּראַכקלאַסן, ווי אויך פֿיר וואַרשטאַטן פֿאַר זינגער און מוזיקער געווידמעט קלעזמער־מוזיק און ייִדיש־געזאַנג.
צווישן די קלאַסן געפֿינט מען אַ סך, אין וועלכע די לערער צילעווען ניט בלויז, אַז די סטודענטן זאָלן פֿאַרבעסערן זייער ייִדיש, נאָר אויך אַז זיי זאָלן זיך דערוויסן וועגן אַ ספּעציפֿישער טעמע פֿאַרבונדן מיט דער ייִדישער ליטעראַטור צי קולטור־געשיכטע. די דאָזיקע סעמינאַרן נעמען אַרײַן סײַ קלאַסן פֿאַר סטודענטן וואָס קענען גוט ייִדיש, סײַ קלאַסן פֿאַר מיטנדיקע סטודענטן, וואָס לערנען זיך ייִדיש ווייניקער ווי צוויי יאָר לאַנג אָבער ווילן זיך פֿאַרטיפֿן אין דער ייִדישער ליטעראַטור.
יעדער קלאַס טרעפֿט זיך 10 אָדער 11 מאָל אויף אַנדערטהאַלבן שעה און קאָסט $295 פֿאַר מיטגלידער פֿונעם אַרבעטער־רינג; $340 פֿאַרן ברייטן עולם. כּדי צו זען די גאַנצע רשימה קלאַסן, גיט אַ קוועטש דאָ.
די סעמינאַרן נעמען אַרײַן:
„שלום־עליכם דער זשורנאַליסט“ (אַבֿרהם ליכטנבוים): כאָטש שלום־עליכם איז הײַנט באַקאַנט ווי אַ מחבר פֿון דערציילונגען, ראָמאַנען און פּיעסעס, האָט ער אויך אַרויסגעגעבן הונדערטער רעפּאָרטאַזשן, פֿעליטאָנען און אַנדערע אַרטיקלען אין דער ייִדישער פּרעסע. די סטודענטן וועלן זיך באַקענען מיט אָט דעם ווייניק באַקאַנטן אַספּעקט פֿונעם גרויסן שרײַבערס ווערק.
זלמן גראַדאָווסקיס גבֿיות־עדות פֿון דער זאָנדערקאָמאַנדאָ (מרים טרין): בשעת זײַנע צוויי יאָר געצוווּנגענער אַרבעט אין דער זאָנדערקאָמאַנדאָ האָט זלמן גראַדאָווסקי געפֿירט אַ געהיימען טאָגבוך. ער איז אומגעקומען אין 1944 בשעת דעם אויפֿשטאַנד פֿון די זאָנדערקאָמאַנדאָ אָבער מע האָט געפֿונען זײַן טאָגבוך נאָך דער מלחמה. מרים טרין וועט באַקענען די סטודענטן מיטן אָריגינעלן טעקסט, ווי אויך דערציילן ווי אַזוי מע האָט אים צונויפֿגעשטעלט, רעדאַקטירט און פּובליקירט.
„דער דיבוק“ (דוד כּ׳׳ץ): די סטודענטן וועלן צוזאַמענלייענען און אַרומרעדן די לינגוויסטישע, קולטורעלע און רעליגעזע (ובפֿרט די קבליסטישע) עלעמענטן פֿון ש. אַנ־סקיס פּיעסע.
משלים פֿון אליעזר שטיינבאַרג (יצחק ניבאָרסקי): די סטודענטן וועלן צוזאַמענלייענען און דיסקוטירן די אייגנאַרטיקע משלים פֿונעם באַקאַנטן בעסעראַבער שרײַבער וואָס שפּיגלען אָפּ סײַ די ייִדישע קולטור, סײַ די גרויסע ענדערונגען פֿון די 1910ער ביז די 1930ער יאָרן. שלום־עליכמס „פֿונעם יריד“ (דוד כּ׳׳ץ): אַ לייענקרײַז פֿאַר מיטנדיקע סטודענטן אין וועלכע מע וועט צוזאַמענלייענען שלום־עליכמס „פֿונעם יריד“ אין יודל מאַרקס אויפֿלאַגע פֿאַר אַרבעטער־רינג־סטודענטן.
ייִדישע ליטעראַטור פֿאַר מיטנדיקע סטודענטן (שבֿע צוקער): מע וועט לייענען ווערק פֿון קאַדיע מאָלאָדאָווסקי, צבֿי אײַזנמאַן, י. ל. פּרץ, יעקבֿ גלאַטשטיין און ציליע דראָפּקין.
„מיט ייִדיש איבער דער וועלט“ (קאָליע באָראָדולין): סטודענטן וועלן זיך באַקענען מיט ייִדישיסטן פֿון פֿאַרשידענע לענדער דורך גאַסט־רעפֿעראַטן.
„רוסישע ייִדישקייט אויף דער צווייטער זײַט אָקעאַן“ (גענאַדי עסטרײַך): אַן אַוואַנסירטער סעמינאַר אין וועלכן מע וועט צוזאַמענלייענען און דיסקוטירן טעקסטן פֿונעם פֿאָרווערטס, וואָס שילדערן ווי אַזוי אַב. קאַהאַן, שלום אַש און אַנדערע מיטאַרבעטער האָבן רעאַגירט אויף דער רוסישער רעוואָלוציע און געשטרעבט אָנצוהאַלטן דעם סאָציאַליסטישן אידעאַל אָן צו שטיצן דעם קאָמוניסטישן רוסלאַנד.
ייִדישע אויטאָביאָגראַפֿיעס (שבֿע צוקער): מע וועט צוזאַמענלייענען און דיסקוטירן אויסצוגן פֿון די אויטאָביאָגראַפֿיעס פֿון די שרײַבער שמערקע קאַטשערגינסקי, קאַדיע מאָלאָדאָווסקי, מלכּה לי, גינע מעדעם, יוסף בולאָף און מלך ראַוויטש.
די ווערק פֿון משה נאַדיר (אַבֿרהם ליכטנבוים): די סטודענטן וועלן זיך באַקענען מיטן שרײַבער, וואָס האָט אַרײַנגעבראַכט אין דער ייִדישער ליטעראַטור אַ נײַעם איראָנישן גײַסט.
A message from our Publisher & CEO Rachel Fishman Feddersen
I hope you appreciated this article. Before you go, I’d like to ask you to please support the Forward’s award-winning, nonprofit journalism during this critical time.
At a time when other newsrooms are closing or cutting back, the Forward has removed its paywall and invested additional resources to report on the ground from Israel and around the U.S. on the impact of the war, rising antisemitism and polarized discourse.
Readers like you make it all possible. Support our work by becoming a Forward Member and connect with our journalism and your community.
— Rachel Fishman Feddersen, Publisher and CEO
