וואַשינגטאָנער חורבן־מוזיי וועט פֿירן אַן אָנלײַן־פּראָגראַם וועגן ייִדישן שרײַבער ירחמיאל בריקסUS Holocaust Memorial Museum to host online program about Yiddish writer Rachmil Bryks
בעלאַ בריקס־קלײַן וועט דערציילן וועגן די כּתבֿ־ידן, וואָס איר טאַטע האָט באַגראָבן אין לאָדזשער געטאָ און זײַן לעבן אין אַמעריקע.
לכּבֿוד דער נײַער ענגלישער איבערזעצונג פֿונעם חורבן־שרײַבער ירחמיאל בריקסעס זכרונות, וועט דער אַמעריקאַנער מלוכישער חורבן־מוזיי אין וואַשינגטאָן אָנפֿירן מיט אַן אָנלײַן־פּראָגראַם וועגן בריקסעס לעבן און שאַפֿן.
בעלאַ בריקס־קלײַן, ירחמיאל בריקסעס טאָכטער, וואָס האָט געשריבן איר מאַגיסטער־טעזיס וועגן זײַן שאַפֿן, וועט רעדן צוזאַמען מיטן איבערזעצער פֿונעם בוך, ירמיהו אַהרן טאַוב. די פּראָגראַם וועט פֿאָרקומען דינסטיק, דעם 20סטן אָקטאָבער, צוועלף אַ זייגער ניו־יאָרקער צײַט.
אין דער פּראָגראַם וועט ירמיהו טאַוב רעדן וועגן די דרײַ ווערק — לכתּחילה באַזונדערע בענד — וואָס ער האָט פֿאַרוואַנדלט אין אַ טרילאָגיע. ער וועט באַשרײַבן בריקסעס ליטעראַרישע דערגרייכונגען און אויך די סטראַטעגיעס מיט וועלכע ער האָט זיך באַנוצט כּדי איבערצוזעצן דאָס בוך ווי געהעריק. בעלאַ בריקס־קלײַן וועט דערציילן וועגן אירע איבערלעבונגען ווי אַ טאָכטער פֿון אַ ייִדישן שרײַבער, איר טאַטנס לעבן אין אַמעריקע, און אירע פֿאָרשונגען איבער די כּתבֿ־ידן, וואָס ירחמיאל בריקס האָט באַגראָבן אין לאָדזשער געטאָ.
דער אײַנטריט איז בחינם אָבער מע מוז זיך פֿאַרשרײַבן פֿון פֿריִער.
להיפּוך צו זײַנע ראָמאַנען און נאָוועלעס, אַזוי ווי „אַ קאַץ אין געטאָ“ און „דער קייסער אין געטאָ“, וואָס דערציילן מערסטנס וועגן לאָדזשער געטאָ, שילדערט דאָס נײַע בוך אַנדערע תּקופֿות פֿון ירחמיאל בריקסעס לעבן, דהיינו זײַנע יונגע יאָרן אין אַ חסידישן שטעטל פֿאַרן חורבן; דאָס ערשטע יאָר פֿון דער מלחמה, און זײַנע איבערלעבונגען ווי אַ צוואַנג־אַרבעטער בײַ די דײַטשן.
