Skip To Content
JEWISH. INDEPENDENT. NONPROFIT.
Yiddish

ייִדישע פֿרוי מיט 1,200 קינדער און קינדסקינדער איז ניפֿטר געוואָרןJewish woman with 1,200 descendants has died

פֿרוי ליבע עטל זילבערשטיין, פֿון דער סאַטמערער קהילה אין וויליאַמסבורג, איז געווען 102 יאָר אַלט.

פֿרײַטיק־צו־נאַכטס, דעם 20סטן מאַרץ, איז פֿרוי ליבע עטל זילבערשטיין, אַ ייִדישע טאָכטער פֿון דער סאַטמערער קהילה אין וויליאַמסבורג, ברוקלין, ניפֿטר געוואָרן צו 102 יאָר. זי האָט איבערגעלאָזט מער ווי 1,200 קינדער און קינדסקינדער, האָט איבערגעגעבן די ניו־יאָרקער וואָכנשריפֿט „יתד נאמן‟.

ביז אַ וואָך פֿאַר איר פּטירה איז פֿרוי זילבערשטיין ע״ה געווען גאַנץ געזונט, האָט געקענט גיין אָן דער הילף פֿון אַנדערע און האָט פֿאַרבראַכט צײַט מיט אירע פֿינף דורות קינדער, אייניקלעך, אור־אייניקלעך און אור־אור־אייניקלעך. פּלוצלינג איז זי זייער שוואַך געוואָרן און באַקומען שוועריקייטן בײַם אָטעמען. שבת איז זי ניפֿטר געוואָרן, אַרומגערינגלט מיט איר משפּחה. ס׳איז נישט באַקאַנט צי זי האָט זיך געהאַט אָנגעשטעקט מיטן קאָראָנאַ־ווירוס.

פֿרוי זילבערשטיין איז געבוירן געוואָרן אין אונגערן אין 1917 און על־פּי־נס איבערגעלעבט דעם חורבן. אירע טאַטע־מאַמע און נײַן שוועסטער און ברידער זענען אַלע אומגעקומען.

אין 1946 האָט זי חתונה געהאַט מיט הרבֿ נתן דוד זילבערשטיין, אויך אַ לעבן געבליבענער פֿון חורבן, וועלכער איז געבוירן און דערצויגן געוואָרן אין קראָקע, פּוילן. זיי האָבן געהאַט אַכט קינדער.

מיט יאָרן צוריק, פּונקט איידער צוויי פֿון זייערע זין, אַ צווילינג, האָבן דערגרייכט בר־מיצווה, איז פֿרוי זילבערשטיין געוואָרן קראַנק מיט אַ טייטלעכן ראַק (יענע מחלה). ווי מע דערציילט אין דער משפּחה איז איר מאַן, וואָס איז דעמאָלט שוין געווען אַ חסיד און חבֿרותא בײַם סאַטמערער רבין, ר׳ יואל טייטלבוים, געלאָפֿן צום רבין און געבעטן בײַ אים אַ ברכה פֿאַר זײַן פֿרוי. דער רבי האָט אים געענטפֿערט אַז דאָס איז אַ שרעקלעכע גזירה פֿון הימל אָבער ער אַליין קען גאָרנישט טאָן.

הרבֿ נתן דוד האָט זיך געבעטן בײַ אים: „וואָס הייסט? בלויז צוליב דעם וואָס איך בין נישט קיין היימישער קענט איר מיר נישט העלפֿן?‟ אַ „היימישער‟ האָט בײַ אים, אַ פּנים, באַטײַט נישט קיין אונגערישער. די סאַטמערער רביצין, וואָס האָט, ווי ר׳ נתן דוד, געשטאַמט פֿון פּוילן, האָט פֿונעם צווייטן צימער געהערט וואָס ער זאָגט, איז זי אַרײַנגעלאָפֿן און זיך געבעטן בײַם רבין ער זאָל מאַכן א ברכה, אַז די פֿרוי זאָל געזונט ווערן. דער רבי האָט זיך באַרעכנט און טאַקע געמאַכט אַ ברכה, צוזאָגנדיק אַז זי וועט האָבן אַ רפֿואה שלימה און אַריכות־ימים. וכּך הווה: געלעבט האָט זי ביז 102 יאָר און איבערגעלאָזט מער ווי 1,200 קינדער און קינדסקינדער.

Dive In

    Republish This Story

    Please read before republishing

    We’re happy to make this story available to republish for free, unless it originated with JTA, Haaretz or another publication (as indicated on the article) and as long as you follow our guidelines. You must credit the Forward, retain our pixel and preserve our canonical link in Google search.  See our full guidelines for more information, and this guide for detail about canonical URLs.

    To republish, copy the HTML by clicking on the yellow button to the right; it includes our tracking pixel, all paragraph styles and hyperlinks, the author byline and credit to the Forward. It does not include images; to avoid copyright violations, you must add them manually, following our guidelines. Please email us at [email protected], subject line “republish,” with any questions or to let us know what stories you’re picking up.

    We don't support Internet Explorer

    Please use Chrome, Safari, Firefox, or Edge to view this site.