מע קען זיך שוין פֿאַרשרײַבן אויף דער „ייִדיש־וואָך“Registration now open for the Yiddish Vokh
אַ טייל פֿון די משפּחות וואָס האָבן זיך באַטייליקט אין דער ייִדיש־וואָך אין 2021 Photo by Meena Viswanath
אויב איר זוכט אַן אָרט וווּ איר קענט פֿאַרברענגען אין די בערג, אויף דער פֿרישער לופֿט, אין גאַנצן אויף ייִדיש, גיט אַ קלער וועגן דער ייִדיש־וואָך וואָס קומט פֿאָר יעדן זומער אינעם שטעטל קאָפּייק, ניו־יאָרק.
אויף דער ייִדיש־וואָך, וואָס וועט הײַיאָר פֿאָרקומען פֿון מיטוואָך, דעם 17טן אויגוסט, ביז דינסטיק, דעם 23סטן, ווערן אַלע אַקטיוויטעטן — לעקציעס, דיסקוסיעס, ספּאָרט און שפּיל — דורכגעפֿירט אויף מאַמע־לשון. יעדעס יאָר קומען אַהין אַ צאָל משפּחות מיט קליינע קינדער, סטודענטן און פּענסיאָנערן, געבנדיק אַלע באַטייליקטע אַ גאָלדענע געלעגנהייט נישט בלויז צו פֿאַרבעסערן זייער ייִדיש, נאָר אויך צו פֿאַרברענגען מיט מענטשן פֿון אַנדערע דורות.
טאָמער זענט איר זיך נאָך נישט באַטייליקט אין דער ייִדיש־וואָך, זאָלט איר וויסן אַז הײַיאָר וועט מען געבן אַ ספּעציעלע הנחה פֿון 15% די יחידים און משפּחות װאָס קומען צום ערשטן מאָל.
ווי עס שטייט אין אַן אַרטיקל וועגן דער פֿאַראַיאָריקער ייִדיש־וואָך, איז דער עולם דעמאָלט געווען אַ ביסל קלענער ווי געוויינטלעך (צוליב קאָראָנאַ) אָבער פֿאָרט פֿול מיט אַקטיוויטעטן, אַרײַנגערעכנט אַ שאַכטורניי, וואַסער־באַלעט־סעסיעס, און לייענקרײַזן פֿון די ווערק פֿון אַבֿרהם קאַרפּינאָוויטשן און איציק מאַנגערן.
צוליב דעם וואָס מע קען זיך נאָך אַלץ אָנשטעקן מיטן „קאָראָנאַ“־ווירוס, וועט יעדער ייִדיש־וואָך־רעגיסטראַנט דאַרפֿן באַקומען אַ נעגאַטיוון רעזולטאַט פֿון אַ PCR־טעסט איידער ער קומט אָן. באַטייליקטע וועלן האָבן די ברירה צו טראָגן אַ מאַסקע צי נישט, אָדער צו אין עסצימער אָדער אין דרויסן אונטער אַ געצעלט.
דאָס עסן איז כּשר און מע קען אויך באַשטעלן מאָלצײַטן וואָס זענען וועגעטאַריש אָדער פֿרײַ פֿון גלוטען. שבת אין דער פֿרי קומען פֿאָר צוויי מנינים — אַן אָרטאָדאָקסישער און אַ גלײַכרעכטיקער — ווי אויך אַ פֿרימאָרגנדיקער שפּאַציר.
כּדי צו באַקומען נאָך פּרטים אָדער זיך צו פֿאַרשרײַבן אויף דער ייִדיש־וואָך, גיט אַ קוועטש דאָ.
