„הערי פּאָטער“־איבערזעצער אַרעלע שעכטער ווישוואַנאַט וועט האַלטן רעפֿעראַט אין שטאָקהאָלם Arele Schaechter Viswanath, translator of ‘Harry Potter’ into Yiddish, to speak in Stockholm
Courtesy of Arun Viswanath
דעם 13טן נאָוועמבער וועט אין שטאָקהאָלם, שוועדן, פֿאָרקומען אַ סעמינאַר וועגן איבערזעצונג אויף ייִדיש, בײַ וועלכן אַרעלע שעכטער ווישוואַנאַט, דער איבערזעצער פֿונעם ראָמאַן „הערי פּאָטער“, וועט זײַן דער הויפּטרעדנער. אַנדערע עקספּערטן וועלן אויך אויפֿטרעטן.
די אונטערנעמונג, וואָס וועט פֿאָרקומען פֿון 9 ביז 17 אַ זייגער, וועט זײַן אויף ייִדיש און איז פֿרײַ פֿון אָפּצאָל. זי ווערט געשטיצט דורכן אינסטיטוט פֿאַר שפּראַך און פֿאָלקלאָר (דער שפּראַכצענטער פֿאַר ייִדיש און דער שפּראַך־ראַט) און דעם אייראָפּעיִשן אינסטיטוט פֿון יודאַיִסטיק, „פּײַדייאַ“.
די אָנטיילנעמער דאַרפֿן נישט זײַן קיין איבערזעצער; עס איז גענוג צו זײַן פֿאַראינטערעסירט אין דער טעמע, ייִדיש־איבערזעצונג. מען דאַרף אָבער זײַן גרייט זיך צוצוהערן צו ייִדיש, און באַזירט אויף די אייגענע פֿעיִקייטן, איבערזעצן אויף ייִדיש אין גרופּעס בעל־פּה און בכּתבֿ. דער ציל איז אַז יעדער באַטייליקטער זאָל זיך קענען אַנטוויקלען אין וואָסער מדרגה ער אָדער זי געפֿינט זיך.
כּדי אָנטיילצונעמען דאַרף מען זיך מעלדן פֿאַרן 3טן נאָוועמבער דורך דעם אָ בליצפּאָסט־אַדרעס: [email protected]
מענטשן וואָס האָבן ספּעציפֿישע באַדערפֿענישן וואָס שייך דעם עסן זאָלן דאָס אָנגעבן אינעם בליצבריוו.
