ישׂראלדיקע ערבֿניצע האַלט אָפּ „כאַמאַס“־טעראָריסטן דורכן גיבן זיי קיכעלעך און „קאָוק זעראָ“Israeli hostage stalls Hamas terrorists by giving them Coke Zero and cookies
Photo by Photo by Screenshot from Israeli Channel 13/Reshet
אַ ישׂראלדיקע פֿרוי מיט איר מאַן וואָס זענען 20 שעה לאַנג געווען ערבֿניקעס בײַ „כאַמאַס“־טעראָריסטן האָבן זיך געראַטעוועט דורכן סערווירן די טעראָריסטן „קאָוק זעראָ“ מיט קיכעלעך.
דער אַטאַק האָט זיך אָנגעהויבן נאָך דעם ווי די אדריס האָבן דערהערט אַ ראַקעט־סירענע און האָבן זיך פֿאַרשפּאַרט אינעם מיקלט פֿון זייער שטוב אין אופֿקים, דרום־ישׂראל, האָט רחל אדרי איבערגעגעבן דעם נײַעס־קוואַל „וואַלאַ“.
פֿינעף מאַנסבילן האָבן צעבראָכן זייערע פֿענצטער, אויסרופֿנדיק אַז זיי זענען פֿון דער פּאָליציי, אָבער זיי האָבן גערעדט אַראַביש. די מענער האָבן זי גענייט אַרויפֿצוגיין צום צווייטן שטאָק, האָבן צעבראָכן זייערע מאָבילקעס, זיי געשטעלט פֿראַגעס און דורכגענישטערט זייערע שאַפֿעס.
„זיי האָבן אָנגעשטעלט אַ ביקס אויף מיר און געהאַלטן אַ גראַנאַט איבער מײַן קאָפּ,“ האָט אדרי געזאָגט. „איך האָב זיי געזאָגט אַז איך דאַרף אײַננעמען אַן אײַנשפּריצונג פֿון אינסולין, און האָב נישט דערמאָנט אַז איך האָב קינדער וואָס זענען פּאָליציאַנטן. איך האָב זיי געגעבן ׳קאָוק זעראָ׳ און וואַסער.“
די טעראָריסטן האָבן איר געזאָגט אַז זיי זענען העלדן און אַז זייערע קינדער שטיצן זייערע אַקציעס. זיי האָבן אויך געהאַלטן אין איין אַרויסקוקן פֿון די פֿענצטער צו פֿאַרזיכערן אַז קיינער קומט נישט ראַטעווען דאָס פּאָרפֿאָלק.
אדרי האָט געזאָגט אַז זי האָט זיך געוויצלט מיט די אַטאַקירער, וואַרטנדיק אויף די ראַטיר־אַרבעטער. „איך האָב זיי געזאָגט: ׳איך וועל אײַך לערנען העברעיִש און איר וועט מיך לערנען אַראַביש.׳ איך האָב פֿאַרשטאַנען אַז ס׳איז אַ פֿראַגע פֿון לעבן און טויט.“
דערנאָך, אַרום האַלבע נאַכט, האָט דאָס פּאָרפֿאָלק דערהערט ווי עס רײַסן זיך אַרײַן די ספּעציעלע כּוחות און זי האָט זיך דערשראָקן אַז זיי וועלן זי על־פּי־טעות שיסן. די טעראָריסטן האָבן זיך צעלאָפֿן און באַהאַלטן ביז מע האָט זיי געשאָסן. „איך וויל באַדאַנקען דער פּאָליציי,“ האָט אדרי געזאָגט. „זיי זענען אונדזערע העלדן.“
