ווידעאָ: יודי ביאַלוסטצקי זינגט ליפּא שמעלצערס „מײַנע תּפֿילין‟WATCH: Yidi Bialostozsky sings Lipa Schmeltzer’s “My Tefillin”
דער אָרקעסטער נעמט אַפֿילו אַרײַן אַ ריזיקע האַרפֿע.
Image by Shiezoli
די גרויסע חסידישע חתונות זענען, קיין עין הרע, ספּעקטאַקלען מיט אָרקעסטערס, כאָרן, זינגער, בדחנים, קוצנן־מאַכערס, אײַז־סקולפּטורן און לעצטנס, אַפֿילו בעלי־חיים וואָס מע באָרגט פֿון די זאָאָ־גערטנער.
קיין חידוש דערפֿאַר איז עס ניט, וואָס אַ סך פֿון די בעסטע ווידעאָס פֿון דער הײַנטיקער ייִדישער מוזיק ווערן רעקאָרדירט אויף חתונות. לעצטנס איז דער זינגער יודי ביאַלוסטצקי (ביאַלאָסטאָצקי) אויפֿגעטראָטן אויף אַ חתונה אין פּאַסעיִק, ניו־דזשערזי, מיטן אָרקעסטער „סאַבאַבאַ‟ און דעם „לבֿ‟־כאָר. צוזאַמען האָבן די צענדליקער מוזיקער און זינגער, אַרײַנגערעכנט איינער וואָס האָט געשפּילט אויף אַ ריזיקער האַרפֿע, אויסגעפֿירט אַ פּרעכטיקן נוסח פֿון ליפּא שמעלצערס „מײַנע תּפֿילין‟ אונטער דער מוזיקאַלישער לייטונג פֿון מענדי הערשקאָוויטש.
דאָס ליד, וואָס פֿאַררופֿט זיך אויף די צײַטן פֿונעם באַרדיטשעווער רבין, האָט לכתּחילה פּאָפּולאַריזירט אַבֿרהם פֿריד.
