דוד קאַץ וועט רעדן וועגן אויסזוכן די לעצטע ליטװאַקעס אין זייער אייגן לאַנדDovid Katz to speak on his search for the last Litvaks in their historic land
30 יאָר לאַנג האָט ער רעקאָרדירט אוידיאָס און ווידעאָס מיט עלטערע ייִדן אין ליטע, ווײַסרוסלאַנד, לעטלאַנד, מזרח־אוקראַיִנע און צפֿון־מיזרח פּוילן.
Image by Dovid Katz
זונטיק, דעם 18טן יולי, 1:00 נאָך מיטאָג ניו־יאָרקער צײַט, וועט דער ייִדישער עטנאָגראַף און לינגוויסט, ד״ר דוד קאַץ, דערציילן אָנלײַן, אויף אַן עכט פּערזענלעכן אופֿן, וועגן זײַן ערשטן באַזוך אין ליטע און ווײַסרוסלאַנד אין 1990, און ווי אַזוי די רײַזע האָט געענדערט דעם פֿאָקוס פֿון זײַן לעבן און שאַפֿן אין גאַנג פֿון די ווײַטערדיקע 30 יאָר.
דער רעפֿעראַט, „מײַנע דרײַסיק יאָר זוכנדיק די לעצטע ליטװאַקעס אין דער היסטאָרישער ליטע‟, וועט זײַן אויף ייִדיש. די אונטערנעמונג ווערט געשטיצט פֿונעם קאָמיטעט פֿאַר ײִדיש פֿון דער UJA פֿעדעראַציע אין טאָראָנטאָ.
קאַץ איז דורכגעפֿאָרן איבער ווײַטע מרחקים אין אָט די מקומות אויסזוכנדיק די לעצטע ליטוואַקעס וואָס זײַנען פֿאַרבליבן אינעם לאַנד פֿון זייערע אָבֿות (בײַם הײַנטיקן טאָג — ליטע, ווײַסרוסלאַנד, לעטלאַנד, מזרח אוקראַיִנע און צפֿון־מזרח פּוילן). ער האָט גענומען אויפֿהיטן זייער לשון, פֿאָלקלאָר און קולטור מיט אינטערוויוען אויפֿגעהיט אויף טויזנטער שעה טאַשמעס (אוידיאָ און אין שפּעטערדיקע יאָרן אויך ווידעאָ). אין צוגאָב צו מעשׂיות און איבערלעבונגען אין וועג וועט ער אויך אַרומרעדן דאָס וואָס מען קען אַרויסדרינגען וואָס איז שייך דעם לימוד פֿון ייִדיש אויף להבא. ער וועט ענטפֿערן אויף פֿראַגעס אויף ייִדיש און אויף ענגליש.
כּדי צו הערן די לעקציע, גיט אַ קוועטשט דאָ.
דוד קאַץ, אַ געבוירענער אין ניו־יאָרק, דער זון פֿון ייִדישן פּאָעט מעינקע קאַץ, האָט 18 יאָר געאַרבעט אין אָקספֿאָרד, וווּ ער האָט געגרינדעט און געבויט דעם לימוד פֿון ייִדיש און אויף אַ ברייטערן פֿאַרנעם אין אייראָפּע בכלל. דערנאָך האָט ער זיך איבעגעקליבן קיין ווילנע און געווען אַ סך יאָר פּראָפֿעסאָר פֿון ייִדיש אויפֿן ווילנער אוניווערסיטעט. ער איז אויך געוואָרן אַן אָנפֿירנדיקער אָפּאָנענט קעגן די נײַערע מינים חורבן־לייקענונג וואָס שטאַמען פֿון מזרח־אייראָפּע. ער איז דער מחבר פון אַ סך ווערק אויף יידיש און אויף ענגליש, און אַרבעט איצט איבער זײַן ענגליש־יידישן ווערטערבוך. זײַן וועבזײַטל איז: www.dovidkatz.net.
